非洲國家盃踏入尾聲，今晚上演另一4強戲碼，喀麥隆鬥加納！「非洲雄獅」喀麥隆今屆缺少球星孭飛下，反而取得佳績，但礙於質素有限，其實每場都陷於苦戰，上仗同塞內加爾激戰120分鐘，僅憑互射12碼勝出，消耗大量體力，匆匆再戰好輸蝕。加納阿休兄弟大勇，而且過去4屆有2屆打入決賽，實力、體力及經驗都佔上風，捧加納客勝。

（TVB 303周五凌晨3時直播）

阿休兄弟當弗交到貨
自從伊度奧3年前退出喀麥隆國家隊後，「非洲雄獅」就陷入青黃不接，2年前非國盃分組賽3戰不勝出局。喀麥隆今屆陣中亦缺少大牌球星，但就有運，分組賽3戰1勝2和勉強出線，8強同塞內加爾踢埋加時都係0比0，靠互射12碼晉級，要留意嘅係，塞內加爾最後射失12碼嘅係沙迪奧文尼，呢名利物浦前鋒前日已經趕返英國為紅軍後備上陣鬥車路士，換言之，喀麥隆能夠晉級，絕對係人棄我取。

計埋呢場互射12碼嘅8強戰，喀麥隆今屆4戰只贏1場，即使入到4強，都令人難以信服，運氣往往可一不可再，尤其係喀麥隆經過連番惡鬥，已經踢到殘，到底今場仲捱唔捱得到尾，實在令人懷疑。

上屆亞軍加納晉級過程輕鬆好多，連贏首2場分組賽後，提早鎖定出線席位，最後1輪明顯留力之下，先至不敵埃及。加納8強出番真工夫，即於90分鐘內以2比1擊敗剛果民主共和國，阿士東維拉前鋒佐敦阿休同韋斯咸中場阿休各入1球，盡顯功架。

拉鋸戰吼埋「和客」
加納除咗有阿休兄弟外，仲有李斯特城中場艾馬迪、拖連奴中場艾古亞等猛將。領隊格蘭更加執教過車路士，將帥都見慣大場面，來到4強關鍵時刻，加納心理質素佔優，可一舉擊敗疲兵喀麥隆。最後特別提醒大家，今仗入球大細兩個中位數分別係「2.5球」同「1.5球」，操盤手明顯覺得今仗係拉鋸戰，少波入，博分頭嘅話，可以玩埋半全場「和客」，有4.6倍都唔錯。