今日大年初二，澳職有筍嘢畀各位過肥年，阿德萊德聯主場對威靈頓鳳凰，撐主隊上盤！榜尾嘅阿德萊德聯今季只係贏過兩場，但今仗竟然要讓半一，盤口擺明有蠱惑。原來阿軍近16次主場鬥鳳凰，取得12勝1和3負嘅絕對優勢，睇嚟真係食硬對手，一於順勢捧2.18倍嘅阿德萊德聯上盤。（有線64及203台周日下午2時直播）

阿德萊德聯今季成績倒退，踢咗16場聯賽只贏過兩場波，不過其中1場就係主場以2比0擊敗威靈頓鳳凰，延續喺橢圓球場剋死鳳凰嘅走勢。事實上，阿德萊德聯近期狀態已經有起色，早前更曾以2比1擊敗當時排第3位嘅墨爾本城，上仗作客榜首FC悉尼都係僅輸0比2，表現並唔失禮。

米利奧斯歷復出喜氣洋洋
阿德萊德聯今場仲收到好消息，就係中場主力米利奧斯歷已經傷愈回歸大軍，有望正選披甲，令球隊增添勝算。

威靈頓鳳凰因為係新西蘭球隊，每次作客都要長途跋涉，飛去澳洲比賽，的確非常蝕章，今季7場聯賽作客僅有1勝1和5負，而且唯一作客勝仗，其實係中立場舉行，近4仗作客每場都失兩粒，班後防擺明一作客就腳軟，難怪威靈頓鳳凰多年來造訪阿德萊德聯，表現都大打折扣。鳳凰今場仲有防線主將馬哥羅斯停賽，情況更加不妙，睇怕難逃再次輸波厄運，一於捧阿德萊德聯上盤過個開心肥年。