非國盃8強賽事今晚展開，喺A組力壓多支勁旅，以首名出線嘅布基納法索，將會面對B組次名嘅突尼西亞。兩隊實力旗鼓相當，但淘汰賽講求堅固防守，呢方面布基納法索就明顯佔優，加上突尼西亞中咗「8強魔咒」，今場仲要讓波，阿King當然係推介布基納法索讓球主勝。（周日凌晨零時開賽、馬會網上文字直播）

突尼西亞係非國盃傳統勁旅，2004年以東道主身份捧盃後，今屆係佢哋近6屆第5次闖入8強，證明實力非凡。不過，攻強守弱嘅突尼西亞卻受到「8強魔咒」纏繞，近4次8強賽事法定時間全部打和，不幸嘅係球隊4次最終都要提早出局。突尼西亞喺分組賽3場失咗5球，防守差勁正正係球隊嘅死穴。

布基納法索名氣雖不及突尼西亞，但近期嘅成績就非常突出，分組賽力壓勁旅喀麥隆同主辦國加蓬以首名出線，全靠一條堅固嘅防線，喺3場分組賽只失兩球，其中1球仲要係輸12碼。布基納法索喺世界盃外圍賽同樣排小組榜首，球員現時士氣如虹，今仗要抵禦突尼西亞唔難，讓球主勝非常值博。

塞內加爾送「大」利是
至於另一場非國盃8強戰，塞內加爾對喀麥隆。塞內加爾喺分組賽入6球，係今屆最多入波嘅球隊之一，攻擊力有保證。喀麥隆表現漸入佳境，今仗更獲千多名球迷隨隊打氣，實同塞內加爾對攻，捧入球大。（周日凌晨3時開賽、馬會網上文字直播）