夢幻雙箭銳不可當
今日下午澳職上演紐卡素噴射機主場對墨爾本城，見到墨爾本城登場，一定要留意陣中進攻「夢幻組合」科拿路利及卡希爾銳不可當。加上對手紐卡素噴射機出名防守差，令科、卡二人今仗有更多搵食機會，捧墨爾本城客勝。

（有線64及203台周五下午4時50分直播）

位居第3嘅墨爾本城雖被榜首FC悉尼拋離雙位數分數，但都掩蓋唔住兩位球星科拿路利同卡希爾嘅鋒芒，前者轟入11球，後者亦有7球進帳。已經年屆37歲嘅卡希爾寶刀未老，上仗上半場已經梅開二度，最終幫助球隊以2比1擊敗中岸水手。事實上，卡希爾以往效力英超愛華頓多年，轉戰澳職超晒班。

卡希爾科拿路利共入18球
29歲嘅烏拉圭前鋒科拿路利，曾經去過意大利及西班牙等歐洲聯賽搵食，雖然名氣冇卡希爾咁響，但勝在實而不華，上季以23球成為澳職神射手，今季繼續保持高入球率。以紐卡素噴射機嘅脆弱防線，好難抵擋得住佢哋。佢拍住卡希爾今季聯賽已合共攻入18球，認真犀利。

至於排尾3嘅紐卡素噴射機本身攻力唔錯，16仗聯賽入咗22球，仲多過第4位嘅布里斯班獅吼。問題係噴射機防守非常弱，今季只得1仗可以保持清白之身，其中近5場每場最少都失兩球。所以經常出現前面入埋，唔夠後面輸嘅尷尬局面，今仗遇上有兩位攻擊好手助陣嘅墨爾本城，噴射機後防勢必有難。