聯賽閉翳 盃賽威威
今晚英足盃第4圈上演「優先場」，由「狐狸」李斯特城作客英冠球隊「綿羊」打比郡。李斯特城今季聯賽閉翳、盃賽威威，今仗仲有兩大非洲兵馬列斯及施利文尼歸隊，人腳整齊番晒，撞正主場遇強即腳仔軟嘅「綿羊」，「狐狸」贏波晉級so easy，客勝有計。

（LeSports HK應用程式周六凌晨3時55分直播）

馬列斯施利文尼回歸李城
雖然李斯特城喺聯賽踢到死氣沉沉，但去到打盃賽即刻醒神晒，唔單止喺歐聯順利殺入16強，並在上圈英足盃靠阿密特穆沙極速省兩粒，作客以2比1反勝實力分子愛華頓晉級，呢種精神面貌同聯賽差天共地。賽前主帥雲尼亞里收到好消息，係陣中嘅阿爾及利亞孖寶馬列斯及施利文尼，因「沙漠之狐」喺非國盃分組賽出局，兩人可提前歸隊，好大機會趕及喺今仗為李斯特城披甲，馬列斯今季係明顯跌Watt，但仍係球隊進攻靈魂，而施利文尼不但喺聯賽有5球進帳，拍住占美華迪成隊中首席射手，仲交出3個助攻，因此佢哋提早歸隊，對「狐狸」進攻幫助極大。

打比郡近5戰英超兵全敗
打比郡喺英冠排第7位，在前英格蘭主帥麥卡倫回巢執教後，一度締造8勝1和，可惜近期走勢明顯回落，近5仗只獲2勝1和2負，睇嚟仲回緊氣。況且「綿羊」喺近5次在英足盃主場對英超球隊，全部輸晒認真曳爆，證明有地利都冇乜符，相信李斯特城今仗可輕鬆過關，一於捧客勝。