今晚比甲上演獨腳戲，尾四奧伊本主場迎戰落泊豪門標準列治，過去有前冇後嘅奧伊本歇冬後一反常態，加強防守希望改善成績，結果衰多兩錢，盃賽聯賽連敗之餘，仲一球都未入過，守將邦迪里都話球隊踢法需要再變，今仗勢必踢番擅長嘅主攻，遇上殘陣到極，防線甚曳嘅標準列治，推介1.7倍大盤。

（周五凌晨3時30分開賽）

奧伊本係比甲失波最多嘅球隊，歇冬前亦係比甲大盤王，防線雖然不濟，但前線非洲孖寶安耶古魯同馬馬度史拉火力甚強，至今合共轟入19球。經過改變踢法失敗，加上後防主力伊巴謙迪亞路停賽，佢哋都知道冇主守本錢，今晚必定喺主場同對手駁火。標準列治繼續沉淪，中場大將泰比爾被挖走，陣中有多達6名傷兵，仲有3位主力離隊踢非洲國家盃，目前陣容極殘。標準列治近期防線甚曳，各項賽事已連續12仗失波，當中有半數失兩球或以上，歇冬後主場就慘吞布魯日3蛋，今晚遇護級對手必圖反彈唔會主守，預計入波唔會少。