近期狀態回勇嘅阿仙奴，今晚主場迎戰般尼，絕對唔係表面睇落咁易食。「兵工廠」近5仗有4勝1和佳績，但經常要踢到生死關頭先至驚險贏波，主場面對「泊大巴」球隊亦經常老鼠拉龜，般尼出晒名拚勁十足，一人走多步下上半場可以頂住阿仙奴，「半場和」值博。（Now 621及LeSports HK應用程式周日晚10時15分直播）

阿仙奴踢法一直被批評太過迂迴，佢哋希望用高度控球嚟消耗對手體力，所以往往要去到尾段先有明顯優勢，尤其弱旅嚟到酋長球場多數都死守，阿仙奴亦往往要用大半場時間嚟搵破綻，近6仗主場聯賽就有4仗開「半場和」，今仗遇上「泊大巴」的般尼，初段隨時處於膠着，半場和值得再追。

近5仗聯賽4次半場和
般尼無論班費同人腳都非常有限，往往係靠球員每仗嘅拚搏精神將勤補拙，連麻煩友祖爾巴頓都修心養性，上仗贏修咸頓1比0更一箭定江山，全隊士氣大振，而且該隊深明自己鋒力麻麻，一旦先落後就好難追平或反勝，所以初段會死守城池，希望保住上半場唔輸，從近5仗聯賽4次開半場和，可見一斑。