近5對賽例炒南特
歐洲歇冬期差不多完結，今晚有唔少賽事舉行，阿King當然搵到好嘢！法甲班霸巴黎聖日耳門（PSG）近況甚勇已經連贏5場，新兵達斯拿兩次上陣都有入波，今仗面對近5次交手都淨輸兩球或以上嘅南特，作客有望輕取對手，讓球盤PSG讓一球／球半，阿King推介上盤。

（TVB 303周日凌晨零時直播）

PSG喺歇冬期間由德甲禾夫斯堡簽入中場達斯拿，此子加盟後迅即融入球隊，喺法足盃大勝巴斯蒂亞7比0同法甲贏雷恩1比0嘅賽事都取得入球，證明狀態甚弗。除咗達斯拿之外，巴西中堅兼隊長堤亞高施華近期亦都有波入，加上只有科特迪瓦後衞奧里亞要出戰非國盃而缺陣，今仗可以話係精銳盡出不勝無歸。

南特喺周中補賽以1比0小勝卡昂，球隊近7仗取得6勝1負狀態同樣唔差，阿根廷前鋒伊美利安奴沙拿連續兩場有「士哥」狀態唔錯。不過，南特近年面對PSG都冇運行，近5次對賽輸晒之餘仲每場都淨輸畀對手兩球或以上，可以話完全被「食住」，今仗就算有主場之利都凶多吉少，讓球盤PSG一球／球半，阿King照捧上盤。

波爾多主場可秤先
另一場波爾多主場對圖盧茲，波爾多雖有前鋒文尼斯養傷，但圖盧茲亦有守將史提夫耶高缺陣，加上近年對賽旺主隊，今仗捧主勝。（TVB 303周日凌晨3時直播）至於南錫歇冬後3戰全勝兼冇失波，加上近6次對卡昂取得4勝2和不敗戰績，今仗必捧讓球客勝。

（周日凌晨3時開賽）