今晚英超亦有場「雙藍會」，由「藍月亮」曼城作客「拖肥」愛華頓。曼城近期改踢4人防線，連贏2仗明顯回穩，不過「藍月亮」近年造訪愛華頓經常陷苦戰；「拖肥」近況反覆，主帥朗奴高文備受壓力下，今仗會小心為上，加上佢哋連續7仗開半場和，兩隊都踢穩陣波，半場和值得追多鋪。（Now 621及LeSports HK應用程式周日晚9時30分直播）

曼城主帥哥迪奧拿之前試用3後衞戰術，搞到狂失波，近期知衰轉打番4人防線，即時穩陣咗好多，連盃賽在內兩連勝轟7粒只失1球，眾將信心返晒嚟。不過「藍月亮」今仗仍有防中費蘭甸奴坐波監，而且近8次作客「拖肥糖」僅得2勝1和5負，唔係贏梗，今仗必定會小心謹慎。

朗奴高文受壓 小心為上
主隊愛華頓上仗足總盃對李斯特城倒輸1比2，近7仗得3勝1和3負堅反覆，令主帥朗奴高文壓力大增，佢與巴塞同門師弟哥迪奧拿強調控球唔同，呢位荷蘭名宿擅於睇餸食飯諗戰術，睇佢當年帶領賣晒主力嘅修咸頓取得歐霸參賽資格就知喇。愛華頓近期初段慣性歎慢板，之前7仗上半場都同對手打和，首循環碰頭同樣開半和，不妨再追。