施治矚目倒戈溫布萊搶頭彩
英超要等到下周先至開鑼，不過溫布萊球場今晚上演嘅社區盾絕對可以畀球迷止住波癮，事關戲碼係「大倫敦打吡」，由上屆足總盃冠軍阿仙奴激砌英超盟主車路士，力爭喺新球季攞頭彩。雙方主帥賽前例牌先爆發一輪口水戰製造話題，而今晚第一男主角肯定係轉會兵工廠後第一場正式賽事就要倒戈鬥母會嘅施治，阿仙奴有埋呢塊「最後拼圖」，防守力比起車路士嘅大巴陣不遑多讓，一於捧細盤！

（有線61、64、201及203台周日晚10時直播）

雲格莫帥賽前互寸
以前睇英超大戰，除咗兩隊宿敵踢到飛沙劈石引人入勝外，仲有雙方領隊之間嘅互動亦好精彩，費格遜同雲格鬥智鬥力，莫連奴同賓尼迪斯嘅互寸等都鬼咁好睇。到咗近呢一兩季，得番莫連奴同雲格呢一Pair最多話題，雲格長期畀「寸王」食住，近13次對住佢都未贏過，上季仲出現「教授」怒推「寸王」一幕，就知雲格有幾唔妥莫連奴。莫帥今場賽前又喺雲格嘅傷口撒鹽，寸爆「教授」仲衰過西布朗領隊佩尼斯：「我記得自己輸過畀佩尼斯兩次，佢分別教水晶宮同西布朗。如果我贏極都贏唔到對方，我會問吓自己點解會咁，然後嘗試為球隊搵出解決辦法。」

咁樣畀人寸，雲格當然唔會啞忍，反擊莫連奴放走世界其中一位最佳門將施治：「施治仲有進步空間，佢有經驗，33至37歲係龍門嘅高峰期。」離開効力咗11年嘅車仔，施治加盟同市死敵冇耐已經掉轉槍頭幫口寸莫帥：「我嚟阿仙奴係因為雲格，當時我要走唔係同莫連奴講，而係直接同車仔高層講。」堂堂車仔主帥都無力阻止呢單交易，係咪好冇面先？

近5度交鋒4次開細
施治加盟「兵工廠」後已經極速幫球隊擸走英超亞洲挑戰盃同酋長盃，雖然只係兩個盃仔，但至少為球隊開季前打下一支強心針，佢嘅加盟有望解決阿仙奴最弱嘅防守，喺後面指揮防線，絕對可起到定海神針嘅作用。

但講真嗰句，阿仙奴要贏車仔又的確係有啲難度，莫帥賽前講明呢場唔係一場友誼賽，要球隊認真作戰，兩軍近5次交手有4次開細，加上上場對巴塞隆拿被打爆鼻嘅中堅加利卡希爾可以上陣，令車路士部「大巴」更加可靠，科娜認為今場捧細最啱數。