科隆尼亞盃今晚繼續喺德國上演，「主人家」科隆會迎戰西甲勁旅華倫西亞。呢項賽事雖同酋長盃一樣，每入一球有額外得分，可惜科隆同華倫陣容變化唔細，球員需時磨合唔在講，兩日內連踢兩場波，雙方教頭作出輪換亦勢必影響戰鬥力，今場要合演入球騷怕且唔易，但相信「蝙蝠軍團」可以質取勝，揀客W啱數。

（TVB302周日晚9:00直播）

科隆新兵多輸默契
科隆季前簽入莫迪斯迪、荷辛拿、米路斯祖積、費達歷蘇連遜、杜明基軒斯等大批球員，新援舊將培養默契需要唔少時間之餘，最弊係原本火力唔多掂嘅佢哋，就連首席射手安東尼烏查亦被雲達不來梅挖角，嚴重削弱鋒線實力。再講，未計尋晚對史篤城，科隆季前踢咗5場熱身賽，雖則贏咗4場，但對手包括奧斯納貝克、幸運科隆在內全部實力平平，相反對番硬淨啲嘅愛斯賓奴，就即刻淨吞兩蛋輸波，今場面對更強嘅華倫難有運行。

「蝙蝠軍團」本身單係箭頭柏高艾卡沙、中場柏利祖同菲侯利就夠晒照，新季為咗應付歐洲賽戰線，除咗買斷曼城前鋒尼格度同賓菲加翼鋒洛迪高摩連奴外，更加簽入辛迪文拿、薩卡利亞巴卡利、祖奧簡斯路、丹尼路巴保沙等新援，增加三線板櫈深度，就算尋晚鬥完葡超勁旅波圖後，今場需要作出輪換或影響發揮，但整體實力亦較科隆優勝，客勝冇難度！