荷甲冠軍燕豪芬，今晚會作客荷蘭盃冠軍格羅寧根爭奪荷蘭超級盃。燕豪芬今個夏天畀人拆骨，冇咗迪比、韋拿杜姆兩大主力，戰鬥力大受影響。雖然格羅寧根實力唔算強，但係依家呢隊燕豪芬認真信唔過。格羅寧根受讓1球，2.62倍嘅「讓主」博得過！

（開賽時間：周一凌晨零時）

燕豪芬賣走兩主力
燕豪芬今夏將迪比、韋拿杜姆兩大奪冠功臣，分別賣去曼聯同紐卡素，勁袋3,950萬鎊（約4.7億港元）。佢兩個夾埋盧克迪莊，喺上季所有比賽包辦72個入球，佔咗成隊波6成「士哥」！依家得番盧克迪莊一個喺前面撐，火力真係差好遠！燕豪芬今夏最大投資就係以近500萬鎊，買咗烏拉圭新星加斯頓佩尼路。呢位小將確係有潛力，但係一時三刻未必可以適應到歐洲波風格，表現可能有折扣。

另邊廂嘅格羅寧根，上季喺荷蘭盃走條靚線，瘋狂KO弱旅，最後擊敗施禾利捧盃。老實講，格羅寧根捧盃係有啲靠運，如果迪比同韋拿杜姆仲喺燕豪芬，今場9成9輸硬，但係依家對手戰力大減，格羅寧根絕對有機偷雞成功！