「MSN」回歸首騷今晚有得睇！巴塞今晚作客費倫天拿，踢埋球隊最後一場國冠盃比賽，當中以歸隊冇耐嘅美斯、尼馬，拍住蘇亞雷斯重組「MSN」鋒線最具睇頭。之但係球王同「新比利」啱啱先至復操，點都要啲時間谷起狀態，想大勝似乎難度唔細，不妨冷敲3.55倍讓球和。

（有線61及201、廣東體育周一凌晨3:00直播）

隨住美斯等南美4星歸隊，一眾巴塞將帥信心明顯有所提升。之前幾仗擔大旗嘅蘇亞雷斯信心爆棚咁話，今季誓幫球隊贏盡6冠，教練安歷基亦希望「MSN」組合打破上季入122球紀錄，喺嚟緊新一季可以轟入140球。有動力係好事，但話晒美斯同尼馬放完假冇耐，好難要佢哋即時交貨囉。

華美倫請假 巴塞防線甩轆
何況「地上最強」連續3仗都係比賽末段失守，後防集中力明顯唔掂，守將杜格拉斯彭利拿又休戰，中堅華美倫又因為榮升老竇，獲球會批准放假缺席今晚賽事，相信安歷基都會用番傷愈復出嘅馬斯真蘭奴同丹尼爾改善防線演出。

另邊廂，對手費倫天拿上仗對住賓菲加，把握唔到踢多個嘅優勢入波，最終只可以憑住互射12碼擊敗對手，證明新帥保羅蘇沙仍然處於摸索階段。呢鋪硬撼「地上最強」怕且都唔敢主動搶攻，隨時守足全場輸少當贏。