因為今夏要踢歐霸盃外圍賽嘅關係，蘇超球隊鴨巴甸喺上季結束後，只係抖咗一個月就要復操，但就因為連場比賽，令球隊好快上晒力，所以今場蘇超開咧戰作客登地聯，客勝唔怕追！

（TVB 301周日晚10時30分直播）

登地聯日前成功簽入大牌球星「史奈達」——個細佬洛尼史奈達，呢位24歲中場一直活喺哥哥陰影下，踢過阿積士青年軍嘅佢未試為阿積士一隊上陣，之後參戰荷乙踢華域克同阿梅爾城都係踢唔起，上周以自由身加盟登地聯，睇嚟呢位「史奈達」都好難令登地聯實力大大增強。

至於鴨巴甸都有位大牌球星「朗尼」——前鋒阿當朗尼係上季隊中神射手，不過佢同曼聯嗰位朗尼就冇乜關係。鴨巴甸今夏已經踢咗多場歐霸盃外圍賽，同熱身賽唔同，呢啲正式賽事可以令球員調整心態，盡快操起狀態。鴨巴甸上場歐霸輸波，但阿當朗尼後備入替只係踢咗半場，擺明為今仗開咧戰留力。登地聯近六場熱身賽全敗，睇見都唔開胃，一於捧客勝！

火燄有前冇後吼大盤
蘇超早場有赫斯主場對聖莊士東，赫斯今季重返蘇超，以往升班球隊喺季初屢有驚喜，加上聖莊士東近期狀態亦唔算掂，今場可以吼主勝。（TVB 301周日晚7時30分直播）最後阿King講埋聽朝美職，芝加哥火燄主場迎戰FC達拉斯，主隊近三場入得又失得，面對火力強勁嘅FC達拉斯，隨時合演入球騷，一於玩大佢！

（TVB 301周一早上7時直播）