今晚英超快車檔期，仲有史篤城主場對「大黃蜂」屈福特。「大黃蜂」近期轉打3人防線，搞到損手爛腳仲唔識死，況且作客4連敗，造訪上仗力戰僅負車仔嘅史篤城，好難全身而退，史軍讓半一照捧上盤。

（Now 622及LeSports HK應用程式周三凌晨4時直播）

屈福特陷信心危機
屈福特主帥馬沙利以往喺意甲最拿手用3人防線，並唔係抄車仔嘅意籍領隊干地，可惜佢嚟到英超用番呢招就唔太Work，近7仗只得1勝1和5負，仲要場場有失波，失咗14粒。不過「巧婦難為無米炊」，上仗對熱刺短短20分鐘內喪失4粒，左翼衞賀利巴斯畀人狂爆之餘，中路嘅卡保奧、普特爾及卡夫卡特又「論論盡盡」，明顯質素有限，上季弗到爆嘅前線黑雙煞恩哈路及迪尼，今季無復勇態，迪尼近5仗只入1球12碼，恩哈路更唔係常規正選，而且連場敗仗令眾將面臨信心危機。最弊係屈福特客場例腳軟，單計近4仗作客全部輸晒，好難期望今仗可反彈。

史篤城雖然近5仗得2和3負，但所輸嘅場次係對住前列分子車路士、利物浦及阿仙奴，敗不足據。睇番上仗作客車仔，史篤城並冇因對手太強而放棄，更一度追成2比2，只係技遜一籌致輸2比4，雖敗猶榮。查實史篤城對同級球隊有一手，今季贏過般尼、史雲斯、侯城及新特蘭，首循環作客亦擊敗今仗對手屈福特，加上前鋒阿拿奧杜域坐完波監可復出，可藉地利戰勝「大黃蜂」搶分，就算讓半一亦要撐上盤。