上齊彈藥砌般茅
英超新年快車全速開動，今晚就有般尼茅夫主場迎戰阿仙奴，喺密集賽程下，球隊兵源同輪換將係勝負關鍵，「兵工廠」近期有多位主力復出，兵多將廣自然有着數；相反「般茅」人腳有限，今仗更有韋舒亞被禁倒戈，此消彼長，不妨進取啲撐2.82倍嘅阿仙奴讓球客勝！

（Now 621及LeSports HK應用程式周三凌晨3時45分直播）

阿仙奴喺12月失分太多，要保持今季爭標希望，未來賽事必要瘋狂搶分。雖然球隊要喺3日內連踢2場，但上仗主場對水晶宮贏得輕鬆，全場撳住打耗力唔大，即使較般尼茅夫抖少1日，亦未見有太大輸蝕。況且隨住艾朗藍斯、梅斯達菲及韋碧克等傷兵相繼傷愈，上仗因病缺陣嘅中場核心奧斯爾亦可望復出，阿仙奴陣容非常完整，有足夠兵源畀雲格輪換。

「兵工廠」近年踢大戰嘅表現備受批評，不過面對實力次一級嘅球隊就非常有把握，佢哋近3次對住般尼茅夫唔單止贏晒，而且3仗都係以2球差距贏出，包括首循環憑阿歷斯山齊士梅開二度同禾確特建功贏3比1，可見兩軍實力有一定分野，阿仙奴今晚就算作客亦有力再歎「私房菜」。

韋舒亞無緣倒戈
般尼茅夫近期表現飄忽，雖然上仗大炒散晒嘅史雲斯，但球隊後防線犯錯頻頻，近4仗主場賽事就有3仗畀對手攻入2球或以上。般尼茅夫進攻能力唔算差，可惜中場指揮官韋舒亞為阿仙奴借將，今仗唔可以倒戈上陣，勢必削弱般尼茅夫嘅組織同進攻能力，面對實力強橫嘅阿仙奴難寄厚望，讓球客勝有2.82倍好分頭，絕對值博。