高手過招穩字行先
日皇盃今日會上演兩場4強大戰，頭場由橫濱水手喺大阪長居陸上競技場迎戰鹿島鹿角。水手近期發揮唔錯，就算有一對外援提早離隊，影響都唔算太大；至於剛奪得世冠盃亞軍嘅鹿角近期氣勢如虹，今仗應該都會延續呢股超強氣勢力爭勝利。兩隊高手過招上半場應該會踢得較穩陣，加上佢哋近期勁旺半場和，半場和有1.97倍值得支持。

（周四中午12時05分開賽）

水手上場8強戰憑中場天野純補時入波擊敗大阪飛腳，粉碎後者爭取3連冠美夢，士氣自然大振。水手雖有兩名外援包括前鋒拉芬夏及後衞法賓奴提早離隊，後衞喜田拓也等幾件上場又搏到傷晒，今仗唔守字行先都唔得，進攻會繼續倚靠剛戰表現出眾的齋藤學與富樫敬真。不過水手連同上仗贏波，已經連續8場波未輸過，球員表現硬淨且鬥志鮮明，有力同鹿角周旋。

鹿角柴崎岳等去德甲勢缺陣
至於鹿角早前奪得世冠盃亞軍後，上仗出戰日皇盃8強戰憑赤崎秀平一箭定江山險勝廣島三箭。不過，喺世冠盃決賽技驚四座嘅中場柴崎岳，到咗星期日（1月1日）就回復自由身，盛傳下月會離隊轉往歐洲發展，征戰德甲可能性好大，因此上仗連後備名單亦唔見，今仗似乎唔會落場。鹿角射手金崎夢生因傷上仗未有披甲，今戰亦上陣成疑，加上主帥石井正忠承認球員已經出現疲態，今仗初段未必會踢得進取。事實上，鹿角最近8場賽事有7場開出半場和，而水手近7仗亦有6場開出半場和，兩隊半場相信都會踢得謹慎，今仗一於再追半場和。