今晚阿King將重心放喺蘇超快車，當中「1哥」些路迪主場對羅斯郡最有信心。些路迪一向喺蘇超打橫行，既然歐洲賽提前畢業，集中火力繼續做「山寨王」已經係最低要求，佢哋喺前利物浦主帥羅渣士帶領下堅搶韁，半場主勝可作過關鐵膽。

（周四凌晨3時45分開賽）

些路迪近18仗聯賽贏足17仗，放到甩轆，就算死敵格拉斯哥流浪今季重返蘇超，亦無損「綠白兵團」領導地位，單計主場更係8場贏晒，當中有7次於上半場已領先對手，證明佢哋主場出戰極為搶韁。些路迪早前於歐聯分組賽包尾出局，連歐霸盃都唔使踢，疊埋心水繼續喺蘇超「蝦蝦霸霸」，加上近5次聯賽對羅斯郡，全部半場就領先，半場主勝可視為過關重心。

串埋巴特里「格流」雙Ｗ
至於同時間嘅賽事，巴特里主場對登地，巴特里近期改踢3人防線，對中前場壓迫及進攻幫助甚大，上仗就反彈擊敗羅斯郡，登地近7仗作客輸6仗，今仗凶多吉少。最後「2哥」格拉斯哥流浪作客聖莊士東，「格流」有卡蘭積卡、辛德路斯及堅尼米拿等前英超兵肋陣，早前領隊禾畢頓更婉拒英格蘭足總邀請擔任英格蘭U21主帥，穩定軍心，面對近4仗主場僅1勝嘅聖莊士東，聯賽4連勝嘅「格流」可再下一城。