近7次碰頭合轟30粒
今日下午澳職獨腳戲，墨爾本城主場對珀斯光輝。今次係兩軍今季第2度交鋒，珀斯光輝上次作客爆冷贏3比2攞足3分，可惜之後無以為繼，隨後8仗聯賽贏得1場，後防更合共狂失18球，狀態大跌Watt，遇上復仇心切嘅墨爾本城，預計有機會同上次一樣出現入球騷，入球中位數3/3.5球嘅大盤有1.92倍，值得支持。

（周二下午4時50分開賽）

墨爾本城同珀斯光輝交手向來都係「大Show」保證，兩軍近7次碰頭合共炮製30個入球，當中有6次總入球達4球或以上，最近1次係今季第3輪聯賽，珀斯光輝作客情況下以3比2擊敗墨爾本城、成功打破對手當時嘅不敗之身。不過，珀斯光輝呢場之後成績全面下滑，8輪聯賽只得1勝2和5負，而且場場都有失波，合共失咗18球，球員狀態及信心跌到落谷底，想重溫上次贏波美夢絕非易事，分分鐘入埋都唔夠輸。

前線雙箭搶胡搵食
墨爾本城上仗於打吡戰1比2不敵勝利後，目前已經畀榜首FC悉尼甩開，如果想保住爭標機會，嚟緊賽事就要谷前搶攻，但咁樣防線就有一定危機。事實上「墨城」唔擅於防守，今季聯賽得1場可保持清白之身，好在前線擁有名將卡希爾及現時射入7球嘅首席射手科拿路利，而珀斯光輝前鋒安迪基奧治至今同樣有7球進帳，兩隊入波總算有保證。既然雙方後防都唔掂，今仗一於等睇入球騷。