7日3戰快車要留放
今晚英超得一場獨腳戲，利物浦主場對史篤城。今次快車檔期，對兩隊相當不利，紅軍七日內三戰，其中兩場更相隔不足48小時；史篤城則遇魔鬼賽程，三仗對手平均英超得分（33.6）為各隊之冠。正所謂凡事去得太盡，緣分定必早盡，預計兩隊今仗都會留有一手，樂比建議今場捧中位數3/3.5球、有1.72倍嘅細盤。

（Now 621及 LeSports HK應用程式周三凌晨1時15分直播）

利物浦屬大開大合球隊，本偏向開大盤，但一本通書唔可以睇到老，嚟到快車檔期，點都會收一收油，好似上周假期第一檔，紅軍明顯已加強防守，結果喺補時階段先憑沙迪奧文尼入波，以1比0小勝愛華頓。

其實睇番過去利物浦喺「拆禮物日」檔期都會踢得比較保守，前季僅以1比0小勝般尼，上季高普接手後亦同樣小勝李斯特城1比0，雖然今年遲咗一日踢，但相信利物浦風格仍會以穩陣行先。

史篤城強「細」專家
睇番成個英超快車賽程，利物浦可謂相當唔好彩，因為大部分球隊都係8日內踢3場，而利物浦則僅得7日，最慘係除夕戰係踢夜場，變相令休息時間又少幾粒鐘，再加上利物浦板櫈深度唔算充足，菲臘比古天奴仍要養傷，領隊高普坦言排陣相當頭痛，預咗會作出輪換，若然今場唔係夫添，自然會增加開細嘅機會。

至於史篤城本身就係一支旺細球隊，係全英超開細次數最多球隊（若以中位數2.5計為65%），前線嘅約拿芬禾達斯、韋菲特邦尼入球能力麻麻，阿拿奧杜域則要停賽，加上佢哋快車檔期相當難踢，下場仲要對榜首嘅車路士，相信領隊曉士面對兩支咁強攻力球隊，都會以守行先。