英超今晚早場，屈福特主場對水晶宮，多得「黑金主帥」艾拿戴斯回歸第一擊，令原本星味欠奉嘅比賽，加添話題。「大Sam」堪稱「弱隊救星」，教波生涯帶領多支英超中小型球隊，從未降班，加上水晶宮向佢開出400萬鎊（約3,800萬港元）護級獎金，啱晒「大Sam」貪錢性格，相信會賣命助球隊走出困境，水晶宮今場受讓平半，一於博下盤。

（Now 621及LeSports HK應用程式周一晚8時30分直播）

屈福特近況往績都差
艾拿戴斯7月獲委任為英格蘭主帥，但僅過兩個月，就被傳媒「放蛇」，踢爆收取黑金幫人處理違規轉會，結果被英足總炒魷。原本以為「大Sam」前途會毀於一旦，估唔到依家已經成為水晶宮新帥。事實上，撇開艾拿戴斯操守問題，佢教波功力的確唔差，之前執教保頓、紐卡素、布力般流浪、韋斯咸同新特蘭，都可以成功護級，水晶宮今次應該請啱人。

雖然話水晶宮近10場輸8場，但當中遇到唔少勁旅，包括近兩場輸畀曼聯同車路士，實屬非戰之罪，今場對手屈福特近況亦差，近5場輸4場，上仗對另1支護級球隊新特蘭，都輸0比1，可見情況唔會好得過水晶宮。同埋屈福特近5次主場對水晶宮，只有2和3負未贏過，今場仲要讓波，梗係捧對家。