意甲周中上演歇冬前最後一輪賽事，周三凌晨有場直播由阿特蘭大主場迎戰安玻里。阿特蘭大今季演出令人驚喜，尤其主場聯賽曾經贏過羅馬、國際米蘭及拿玻里等勁旅，穩贏作客腳軟嘅安玻里兩粒，讓球主勝可作為今日過關重心。
（TVB 302周三凌晨3時45分直播）
阿特蘭大雖然連續3仗聯賽未贏過，不過當中2仗作客賽事分別對祖雲達斯及ＡＣ米蘭，失分情有可原，其實今季佢哋喺主場表現一直好穩定，今個月初輸畀烏甸尼斯之前，主場聯賽一度錄得4連勝，對手包括羅馬、國際米蘭及拿玻里等強隊，含金量十足。安玻里開季17仗聯賽只係贏過3場，如果唔係榜尾三弱佩斯卡拉、巴勒莫及克羅托內表現太曳，安玻里排名隨時仲低。睇番安玻里今季作客成績，8仗聯賽只得1勝3和4負，唯一贏波係以4比0擊敗包尾大幡佩斯卡拉，最慘佢哋其餘7仗作客一球都入唔到，攻力疲弱好難搶分，捧讓球主勝啱數。
些路迪冇後顧「-2」添食
另外兩關賽事，先講蘇超些路迪主場鬥巴特里，些路迪完成歐聯分組賽後，連續3場聯賽都贏波，包括月中作客大勝今場對手巴特里4比1，今次返番主場有力炒多鋪，必捧讓球主勝。最後講埋西班牙盃第4圈次回合，馬德里體育會主場鬥西丙球隊古祖洛。馬體會首回合大勝6比0，晉級毫無懸念，今仗隨時畀班主力休息提早放假，捧入球細好路。
