近年對賽剋死水手
澳職今日上演獨腳戲，由中岸水手主場鬥布里斯班獅吼，獅吼向來係中岸水手嘅剋星，兩隊近7次對碰布里斯班獅吼獲得全勝，論近況中岸水手亦甚為低迷，近5戰只得1勝1和3負，縱有主場之利亦唔見得可以抵禦對手，1.52倍嘅布里斯班獅吼客勝熱食趁手。（有線64及203台周日下午2時直播）

布里斯班獅吼上仗以4比0大破阿德萊德聯，中場湯馬士基斯甸臣個人梅開二度，表現醒神，最重要係球隊成功打破之前4連和悶局，可望提升信心。

水手主場戰績曳爆
現時排聯賽榜尾2嘅中岸水手愈踢愈沉，繼主場1比4不敵西悉尼流浪者後，上仗再以0比3輸畀威靈頓鳳凰，而且都係上半場已經落後。中岸水手今季10仗聯賽已失咗20球波，防線猶如中門大開，亦反映球員信心近乎崩潰。佢哋今季4仗主場只有1勝3負，屬於主場成績最差球隊，今仗就算有地利，恐怕亦無補於事，一於強捧獅吼客勝。