德甲去到歇冬前倒數第2輪，RB萊比錫今晚主場對哈化柏林，係聯賽榜二哥對三哥之爭，兩軍今季表現同成績都予人驚喜，雙方教練夏辛侯迪同戴達亦同樣重視防守紀律，兩個都係靠穩守突擊起家，咁啱兩軍上輪齊捱悶棍，都以0比1輸畀排名較低對手，今仗兩「盾」相遇估計入波唔會多，黑柴首選1.75倍細盤，萊比錫主場出擊稍秤先，佢哋習慣尾段發力，下半場入波遠多於主半場，想好分啲可以博埋4.1倍半全場「和主」。

（Now 672、有線61及201台周六晚10時30分直播）

年輕速度高係萊比錫今季爆紅嘅本錢，但教練夏辛侯迪重視防守，唔輕敵輕出至係成績優異嘅根源，呢套踢法令佢哋喺作客比賽如魚得水，亦順理成章成為目前德甲作客王。不過，當主場遇上主守球隊，佢哋嘅反擊速度同威力就因為搵唔到空位而受到限制，球隊至今踢咗14輪比賽入咗29球，當中只有12球係主場取得，今季兩次大勝對手3球或以上，亦同樣係客場。另一邊廂，哈化教頭戴達對防守紀律重視程度更甚，佢要求中前場失波後即進行搶逼，盡量減輕後防壓力，今場作客遇上德甲最紅球隊，當然以守為先。

慣尾段發力博埋「和主」
萊比錫除咗主場入波少之外，佢哋因為年齡優勢，耐戰力都比其他德甲球隊勝一籌，所以佢哋29個入球當中，有17個入球係下半場取得，14場聯賽共有8次開出半場和，而且今仗之後僅4日，佢哋會喺歇冬前最後一場聯賽作客安聯球場火併拜仁，今場絕對唔輸得之餘亦想保留體力，自然會更加謀定後動，捧細盤之餘一於博埋「和主」啦！