強勢衝擊10連勝
「藍色戰車」戰無不勝！英超周三深夜繼續有多場大戰，狀態大勇嘅「藍戰士」車路士作客下游分子新特蘭，睇怕贏波都冇乜難度。車仔今季冇歐洲賽包袱，全力爭取重奪聯賽錦標，近9仗聯賽全勝，今仗造訪遇強即屈嘅「黑貓」，有力延續強勁走勢，讓球客勝不容錯過。

（now 622及LeSports HK 應用程式周四凌晨3時45分直播）

車路士今季喺干地執教下脫胎換骨，尤其球隊唔使踢歐洲賽，一班球員體力夠晒保證，踢快車絕對難唔倒佢哋。自從早前干地變陣343後，「深藍戰車」即變得無堅不摧，喺聯賽全速前進，上輪擊敗西布朗後，車仔已經連贏9仗聯賽銳不可擋，曼市雙雄、熱刺等強隊都係手下敗將，單計作客亦豪取4連勝，當中有3次至少贏2球。

依家車路士陣中只得葛特蘇馬、泰利同雲堅基爾3名傷兵，對球隊戰鬥力冇太大影響，除咗3中堅陣式令防線固若金湯之外，西班牙前鋒迪亞高哥斯達亦勇達巔峰，目前以12個聯賽入波排射手榜No.1嘅「迪哥」，近9次中目標嘅攻門入咗7球，效率高成咁，車仔想唔大勝都難。

「黑貓」新特蘭遇強即屈
另邊廂，新特蘭擺脫開咧連場不勝困局，自11月開齋後表現有起色，不過呢支護級分子遇強即屈，今季聯賽出戰Big6之一嘅利物浦、阿仙奴、熱刺同曼城全部輸晒，在護級角度嚟睇，主帥莫耶斯明知面對強隊搶分機會唔大，所以都無謂耗力太多，反而將精力集中出戰同級對手身上，今仗對車仔似乎預咗大敗。