另一場世冠盃半準決賽，由東道主代表鹿島鹿角於大阪市立吹田足球場鬥非洲冠軍馬姆洛迪辛當斯。鹿角上仗反勝大洋洲冠軍奧克蘭2比1，日職總決賽功臣金崎夢生後備上陣建奇功，近2仗轟入3球狀態大勇。非洲代表近年喺世冠盃戰績平平，來自南非嘅馬姆洛迪辛當斯惡唔出樣，1.73倍主W值博。

（有線61及201台周日晚6時30分直播）

金崎夢生腳風堅順
鹿島鹿角上仗資格賽面對大洋洲冠軍奧克蘭於先失1球情況下，憑兩名後備上陣嘅球員赤崎秀平及金崎夢生各入1粒，最終以2比1反勝對手，得以喺今日亮相。金崎夢生繼日職總決賽次回合對浦和紅鑽梅開二度、助鹿角封王後再做英雄，腳風順到不得了，而且鹿角連同上仗在內，近5仗比賽贏咗4仗，當中近2仗都係後來追上反勝對手，士氣、信心爆晒棚，今仗更有主場球迷打氣，聲勢自然遠勝對手百倍。

非洲代表對上兩屆世冠盃都喺半準決賽止步，上屆來自剛果民主共和國嘅馬贊比就係以0比3輸畀另一支日職球隊廣島三箭，今屆來自南非嘅馬姆洛迪辛當斯咁啱又係遇上東道主球隊，舟車勞頓體力輸蝕，1.73倍主W值得捧場。