米希達利恩化身最強刺客
今輪英超最強戲碼，一定係「紅魔鬼」曼聯主場火併熱刺。經歷聯賽連番失利，曼聯喺之前歐霸盃靠米希達利恩化身「最強刺客」，擊敗索爾亞，即刻信心返晒嚟！今晚面對實力接近嘅熱刺，肯定食住個勢狂攻，揀2.5球入球大外，博埋3.2倍嘅和波就fit晒！

（Now 621及LeSports HK應用程式周日晚10時15分直播）

米希達利恩自從由多蒙特以2,600萬鎊加盟紅魔後，一直備受傷患困擾兼狀態麻麻，所以未能搶到正選席位，但呢位上季德甲最佳球員近況回勇，喺佢第11場為球隊上陣嘅比賽——歐霸盃作客對烏克蘭球隊索爾亞一仗中，突然變身「最強刺客」，如入無人之境咁單騎殺入敵方陣地一劍封喉，幫球隊開紀錄兼取得喺曼聯嘅處子球！呢位帶領紅魔躋身32強嘅功臣仲話，下一個入球想喺奧脫福球場出現添！

就連一向招積、牙擦嘅射手伊巴謙莫域都大讚呢位新拍檔，況且伊巴自己近排腳風都幾順，近6場轟入7球，進攻火力勁成咁，今晚唔慌冇士哥睇呀！

實力相若吼埋和波
另邊廂，熱刺喺歐聯分組賽提早畢業，經已疊埋心水爭歐霸盃。喺聯賽方面，未計尋晚賽事，曼聯同熱刺分別排喺聯賽榜第6同第5位，熱刺有6分優勢，實質差距唔大，反映兩軍現時實力屬「五五波」。

熱刺早前大勝史雲斯5比0，其中一位入球功臣孫興民更攻入個人今季第5個入波，終打破近兩個月嘅聯賽入球荒！加上王牌射手哈利卡尼、迪利阿里等主力攻堅，要射破今季僅得2場比賽保持清白身嘅曼聯唔難，預計今晚兩軍會放膽鬥攻，入球大必捧之外，小注3.2倍嘅和局博雙響。