至於Super Saturday中間嗰場，就上演德甲國家打吡，「1哥」拜仁慕尼黑作客「蜜蜂兵團」多蒙特。兩軍嘅敵對關係今季稍為放緩，拜仁主帥「肥安」安察洛堤一向係務實派，就算造訪仍有不少傷兵嘅多蒙特，初段亦唔會輕舉妄動，睇準先食，以雙方今年3次碰頭皆開半場和嘅往績，半場和值得追多鋪。（Now 670、FoxSports Play、有線61、64、201及203台周六深夜1時30分直播）
拜仁習慣盡收德甲勁敵嘅兵器，達到此消彼長之效，多蒙特近年更成為「重災區」，馬里奧葛斯、羅拔利雲度夫斯基、曉姆斯先後被拜仁收歸旗下，令彼此甚多牙齒印。不過今季兩軍關係有所改善，拜仁於今夏簽入曉姆斯後，竟然願意讓馬里奧葛斯回歸多蒙特，陣中另一悍將施巴斯坦洛迪亦轉投「蜜蜂兵團」，證明世上冇永遠嘅敵人。
拜仁主帥安察洛堤雖不至於曼聯莫連奴般打法功利，但與前任哥迪奧拿控球大過天相比，他偏向務實打法，最重要係贏波，能否大勝或係咪全場佔上風只屬其次，尤其係造訪強敵，必定穩陣行先。睇番今夏德超盃拜仁作客多蒙特，全場被「蜜蜂兵團」壓住嚟打，卻憑維達爾及湯馬士梅拿兩次突擊得手，劣勢之下贏2比0，充分體現出「肥安」因時制宜嘅教波哲學。
今年3度交鋒半場皆0:0
多蒙特於國際賽前一度陷低潮，之前5仗聯賽只獲1勝3和1負，難怪跌落第5位，儘管傷兵問題略為轉好，但現時仍有紐尼沙軒、施雲賓達、蘇保迪、艾歷杜姆未好番，令主帥杜曹非常頭痕，今仗對拜仁亦不敢冒進。翻查紀錄，原來雙方今年3次交手，上半場皆未分勝負，全部上半場皆開0比0，包括剛提及嘅德超盃，預計今仗初段雙方會穩打穩紮，半場和乃不二之選。
