明午東南亞錦標賽揭幕戰，亦係於菲律賓舉行嘅A組頭場，由上屆盟主泰國硬撼印尼。由於泰國出線世盃機會渺茫，可疊埋心水全力爭東南錦，挾近2屆分組賽6戰全勝佳績，面對實力遠遜嘅印尼，淨勝兩、三球濕濕碎，捧主W。

（Now 670及Fox Sport Play周六下午4時30分直播）

泰國貴為4屆東南錦盟主，亦以衞冕身份征戰今屆賽事，儘管幾日前先喺世盃外主場以2比2逼和勁旅澳洲，體力消耗唔少，但既然出線世盃決賽周機會渺茫，更加可疊埋心水爭取衞冕。睇番泰國大軍名單，全部球員於國內搵食，10月因泰王病逝，國內聯賽即時「停擺」，變相令眾將獲得休養生息，養精蓄銳迎接東南錦，對該隊百利無一害。

印尼實力次一級
印尼整體實力遠遜泰國，近2屆東南錦皆於分組賽行人止步，相反泰國對上2屆分組賽6仗贏晒，狂轟16球，甚具王者霸氣，要炒起印尼響勝鼓毫無難度，主勝好路。