世界盃外圍賽歐洲區A組，今晚上演榜首大戰，由法國主場迎戰瑞典，兩支球隊目前同得7分並列榜首，法國貴為歐國盃亞軍，牌面上無疑高一班，不過最邪嘅係，法國一眾攻擊球星近期集體失魂，面對換帥後重新注入生氣的瑞典未必能夠輕取，慢熱嘅法國大有機會開「半場和」。

（有線64及203台周六凌晨3時45分直播）

法國領隊迪甘斯手上兵源足，不過依家竟然面對進攻主力集體缺態嘅尷尬，被視為未來鋒線王牌嘅安東尼馬迪爾因狀態差落選，獲重召嘅基奧特只係啱啱傷愈，今季喺阿仙奴又長居後備，加上保羅普巴、皮耶等核心今季演出備受批評，狀態令人懷疑。

近4交鋒全開半場和
瑞典雖然有王牌球星伊巴謙莫域退出國家隊，不過新帥贊尼安達臣上場後，將球隊年輕化有唔錯效果，除伊巴謙莫域外，施巴斯坦拿臣、卡斯唐等老將已經冇入選，目前陣中有15人年齡處於22至26歲嘅黃金期，體力同活力肯定充足，上半場絕對有能力抵抗法國進襲。

數據顯示，法國自千禧年後4次同瑞典交鋒，成績係勢均力敵，法國4次對賽雖然有2勝1和1負的稍微優勢，但4仗上半場都係打成平手。法國球員平均個人技術高超，戰術亦以控球為主，踢法比較慢熱，球員狀態未足下，上半場更加難望拎到甜頭。