英超仲有一個禮拜就開波，不過利物浦今晚繼續搵嚟非強隊拍跳，作客對芬蘭班霸赫爾辛基，各位利迷一心想睇兩大新兵羅拔圖法明奴同賓迪基相信會失望，事關佢兩個都冇隨隊，赫爾辛基狀態及防守唔曳，紅軍弱陣出擊下未必大勝到，捧2.55倍入球細仲好！（有線61、64、201及203台周日凌晨零時30分直播）
當英超列強車路士、曼聯同曼城喺國冠盃同各地勁旅踢季前熱身賽，利物浦嘅對手只係泰國明星隊、布里斯班獅吼、馬來西亞明星隊等，搵佢哋拍跳都幾難達到練兵效果，更何況紅軍表現亦唔見突出，堂堂英超豪門只有對泰國明星隊一戰大勝4比0，其他幾場唔係小勝就甚至和埋，暫時睇唔到簽入多名新兵嘅利物浦有咩進步。
利物浦領隊羅渣士賽前話會派出強陣應戰，不過結果得個講字，事關兩位貴價兵羅拔圖法明奴同賓迪基都冇隨隊去芬蘭，而安利簡恩亦冇喺大軍名單之上，只有延遲歸隊嘅菲臘比古天奴有機上陣，就算計埋佐敦軒達臣、拉爾拉拿等主力，戰鬥力都唔算好強，仲要擔心新舊球員未夾得熟，所以唔好預期紅軍入波會多。
赫爾辛基狀態勝紅軍
利物浦今次到訪芬蘭，係因為名宿希比亞為紅軍喺當地儲咗好多粉絲。紅軍對上一次鬥赫爾辛基要數到25年前，赫爾辛基屬芬蘭國內班霸，連續六年都登上芬超冠軍，依家國內聯賽進行得如火如荼，一班球員嘅狀態肯定好過紅軍，球隊近4戰錄得3勝1和，4場只係失咗2球。踢完呢場友誼賽，赫爾辛基3日後就要踢歐聯外圍賽，要避免今場大敗影響士氣，又要保存體力，最好辦法當然係守喺後面唔立亂進攻，咁搞法相信紅軍只能老鼠拉龜，2.55倍細盤好路。
