友賽試陣驚露底
南韓今日主場同加拿大拍跳，處於兩難局面，唔贏咩，肯定畀傳媒插得仲勁，士氣更加低落，贏場好好睇睇嘅，又怕畀烏茲別克摸清路數，呢啲冇乜實際效用嘅友誼波，睇怕南韓贏都唔敢去得太盡，係咁意玩個1.82倍入球細算數。

（周五晚上7時開賽）

「太極虎」目前喺世界盃亞洲區12強賽A組，暫得7分排第3位，落後伊朗、烏茲別克3分同2分，所以下星期二主場對烏茲別克場波，畀當地傳媒形容為生死戰，唔贏唔得。正因為咁，南韓今次專登搵加拿大過嚟陪練，目的就係適應歐陸式體力型打法，為下場大戰做準備。

家陣嘅南韓面對好大壓力，主帥史泰歷克嘅調兵遣將，開始畀人質疑，尤其上場世盃作客輸畀伊朗0比1之後，「太極虎」畀傳媒插到遍體鱗傷，佢哋甚至認為下星期贏唔到烏茲別克嘅話，南韓連續9次躋身決賽周將會成為泡影，到時史泰歷克肯定要上斷頭台，執硬包袱咁話。

加拿大喪徵召新人
史泰歷克自然聞到味，佢針對南韓防線兩閘弱，前鋒把握力唔夠，今次徵召咗闊別國家隊7個月嘅多蒙特衞將朴柱昊返嚟，仲Call埋踢緊奧地利薩爾斯堡嘅20歲新秀前鋒黃喜燦，希望改善呢兩個問題。但係孫興民、奇誠庸同洪哲報到嗰陣有傷，今日未必踢足，史泰歷克亦表明會不斷試人，上下半場人腳可能變動好大，咁樣根本無條件輕鬆大勝。

咁啱加拿大為遷就啲踢緊美職、NASL季後賽嘅國腳，徵召咗7件新人，全隊有8個細過24歲，經驗最豐富嗰件係溫哥華白帽後衞馬素迪莊，成隊新老混合，戰鬥力唔算強。不過話時話，加拿大以前兩次喺美洲金盃對住南韓，取得勝和各一未輸過，似乎食正「太極虎」嘅速度力量型打法，今日輸都未必好難睇，呢啲場合冇乜理由唔博細。