聽朝世盃外南美洲區爆發重頭戲，由「1哥」巴西主場硬撼死敵阿根廷。巴塞雙星尼馬與美斯今仗各為其主，幾friend都冇面畀，巴西王牌尼馬為升呢挑戰美斯嘅球王地位，今仗必定搏到盡，加上「森巴兵團」近5仗世盃外主場出擊贏咗4次，撞正作客麻麻嘅「潘帕斯雄鷹」阿根廷冇有怕，一於捧主勝。

（周五早上7時45分開賽）

係人都知美斯與尼馬喺巴塞堅老友，尼馬對呢位球王更係服到五體投地，不過「新比利」確係有極大潛力，喺未來接替美斯成為新球王，而且佢今夏帶領巴西參加奧運，從分組賽表現勁曳，去到淘汰賽愈來愈弗，更打破魔咒奪得金牌，可見尼馬完成蛻變，呢種獨有嘅冠軍氣質，及場場搏到盡嘅拚勁，甚有「準球王」風範。查實巴西於今屆世盃外主場特別醒神，5次在自己地頭出擊，錄得4勝1和佳績，難怪排緊「冧巴溫」喇，自年中接替鄧加擔任主帥嘅迪迪，帶隊4仗全部贏晒，佢畀到球員更大進攻自由度，令尼馬可卸下防守重擔盡情發揮，比起頑固嘅前任鄧加靈活得多。

阿根廷各自為戰唔樂觀
相反，排第6位的阿根廷在新帥巴烏薩8月接手後，只獲1勝2和1負戰績，上仗世盃外更於主場不敵巴拉圭0比1，前線縱有迪馬利亞、阿古路、希古恩等球星，但佢哋個個都掛住自己踢，令戰鬥力大減，就算美斯在陣亦幫唔到幾多。加上阿根廷今屆世盃外客場表現麻麻，近5仗僅得2勝3和，作客委內瑞拉、秘魯、巴拉圭等二流球隊只能和波，今仗造訪實力更強的巴西更難樂觀，加上巴西近2次主場對阿根廷全勝，有力擊退死敵振聲威。