國際賽前夕，又係上演英格蘭聯賽錦標嘅時候，嚟到分組賽最後一輪比賽，北部B組競爭非常激烈，4隊同得3分，今輪交鋒無疑係生死戰。克魯主場對車士打菲特，阿King睇好車士打菲特贏波出線，事關雙方近3次對賽，車士打菲特全部贏晒，擺明格食格，一於捧客Ｗ。（周三凌晨3時30分開賽）

英甲球隊車士打菲特前排一度連輸7仗，好彩上場英足盃及時反彈，作客以2比1擊敗高車士打，大大振奮士氣，隨時係見底回升嘅信號。今場勝負最關鍵因素係車士打菲特一向食住克魯，之前3次交手，車士打菲特都勝出，包括作客贏2比1，今仗有力反客為主。

克魯遇「剋星」冇運行
至於克魯係英乙球隊，級數低一班，同埋佢哋近4次主場都贏唔到，其中近2次主場都輸波，包括上輪英格蘭聯賽錦標，2比3不敵狼隊U23，今仗遇上剋星車士打菲特，更加冇運行。

北部A組都係4隊同分，車頓咸主場對保頓，英甲保頓唔止高對手一個聯賽級數，且狀態大勇連贏7場只失1球，攻守兼備，追保頓客勝。北部G組劍橋聯主場對斯肯索普，兩隊都已取得出線權，未必會搏，寧願捧細。