繼皇馬之後，馬德里體育會亦來到亞洲踢熱身賽，首站作客日職球隊鳥棲砂岩。中國富商王健林年初入股馬體會，呢支西甲勁旅亦銳意進軍亞洲市場，今次費蘭度托利斯、基沙文、堤亞高文迪斯等球星都有隨隊，頭炮當然要做齣好戲，盡炒鳥棲砂岩，為下周二戲肉鬥中超球隊上海上港造勢，直取馬體會讓球客勝。（有線61、64、201及203台周六晚6時直播）
踢好波為上海戰造勢
西甲近年愈來愈重視亞洲市場，甚至提早比賽時間遷就直播，馬體會屬於訪亞「稀客」，更要落多幾錢肉緊，踢好波贏口碑，否則好難同球星如雲嘅皇馬及巴塞搶客，相信教練施蒙尼今場會派出強陣贏場漂亮勝仗，等下場作客上海吸引更多中國球迷入場。
馬體會兩位射手費托同基沙文狀態不俗，早前熱身賽各入1球擊敗奧維多。美中不足係新簽哥倫比亞射手積臣馬天尼斯冇隨行，但要撕破鳥棲砂岩防線並唔困難。鳥棲砂岩近5場聯賽未贏過，包括上仗吞鹿島鹿角3蛋，冇餘力同馬體會「玩」，難免會留有一手，專注改善聯賽成績，今場輸少當贏。
