一場過決賽唔使急!
新一季德甲仲有兩周至開鑼，不過兩大班霸，上屆聯賽冠軍拜仁慕尼黑同德國盃盟主禾夫斯堡，今晚會先行角逐德國超級盃。比賽法定時間90分鐘，賽和不設加時，即以互射12碼決勝。拜仁客W熱到得1.67倍唔值博，皆因這項賽事自4季前改制由德國盃冠軍或聯賽亞軍主場，聯賽冠軍作客後，4屆皆由主隊捧盃，拜仁主帥哥迪奧拿上任後踢過兩屆都輸，今晚比賽喺禾堡嘅福士球場踢，拜仁冇明顯優勢，考慮雙方近期喺熱身賽表現都係謀定後動，黑柴寧捧2.3倍半場和。（FOX Sports now 670周日凌晨2時30分直播）
拜仁訪華歸來未回氣
拜仁經過中國行吸金千萬歐元，但除咗要適應濕熱天氣，全程場外活動頻繁，應付3場比賽已經疲於奔命，真正操練時間唔多，球隊踢法慢熱，中國行最後兩場對國際米蘭同廣州FC都係半場冇交收，對廣州半場更處於下風，返到德國後只得短短3日時間準備呢場硬仗，好難迅速上力，目前拜仁仲有列貝利、洛賓、丹迪、查維馬天尼斯、畢斯杜巴同卻治賀夫等傷兵，新加盟嘅維達爾剛投入操練，今場會先列後備，人腳並唔齊整。
拜仁上次作客禾堡係上季次循環歇冬後第一仗，結果慘敗1比4，吸收該仗教訓，相信哥迪奧拿會先謀定後動，唔急於搶攻。
禾夫斯堡上屆雖然以10分之差得亞軍，但所獲好評唔會比拜仁少，喺啱啱公布嘅德國足球先生同最佳教練選舉，分別由佢奇雲迪布尼同赫基奪得，成為大贏家，今晚主場出擊，牌面唔輸蝕，只係狀態未弗。
禾堡前鋒線明顯缺態
禾堡較早前熱身賽兩日內先後輸畀維拉利爾同阿仙奴，前線組合明顯冇態，今仗除有路爾斯古斯達禾、比列錫同肯特因傷缺陣外，王牌中場奇雲迪布尼周四操練亦因背傷提早休息，雖然傷勢唔重，但教練赫基講明唔會冒險派冇百分百狀態嘅球員上陣，迪布尼上次對拜仁貢獻兩入球一助攻，一個打晒咁滯，冇咗佢肯定差好遠，既然佢上陣與否係未知數，大家等埋最後名單至落注都未遲，賽前推介寧吼半場和。
