蘇超開鑼由衞冕冠軍打頭陣，些路迪今晚喺主場對羅斯郡，當然要捧「-2」嘅2.1倍「讓球主勝」，畢竟些路迪已經連續7年喺開咧戰贏波，而且佢哋喺熱身賽同歐聯外圍賽已經踢到上晒力，睇怕羅斯郡會全場捱打。（TVB301周六晚7:45直播）

些路迪已經連續4年奪得聯賽冠軍，根本冇人阻到佢哋喺聯賽打橫行。再講，對上7季些路迪喺蘇超開咧戰全部贏波，就算佢哋跟手要喺歐聯第3圈外圍賽再對卡拉巴克，睇怕都唔會因為咁而留力，事關些路迪首回合主場揸住1球喺手，場波可以睇定嚟踢。

些路迪新兵啱使
仲有呀，些路迪新簽入嘅登地聯前鋒施夫斯同曼城後衞保耶達，都已經得到重用，當中施夫斯更加喺上季聯賽攻入14球。對家羅斯郡有好多新兵加盟，但離隊球員都唔少，而且新加盟球員入面，似乎得巴拉福特中場安祖戴維斯踢得吓，對住大超班嘅些路迪季初未夾熟恐怕好難爆得出。