人腳唔齊前鋒卡士曳
利物浦連續拍跳作最後衝刺！紅軍今晚先作客芬蘭同赫爾辛基交手，再喺24小時內返英格蘭造訪史雲頓踢最後一場熱身賽，之後要等到英超開鑼先再同大家見面。雖然佢哋今仗有發電機菲臘比古天奴歸隊，不過一對箭頭丹尼艾格斯同奧歷治仲未建立好默契，好難擦出火花啫，都係揀2.55倍細盤穩陣。（有線61、64、201及203周日凌晨0:30直播）

紅軍上個月去咗亞洲踢4場熱身賽，當中2大土炮兵最sharp醒，新兵占士米拿喺其中2場攻入致勝入球，新隊長佐敦軒達臣夾埋亦交上3個助攻，加埋「古仔」歸隊照理有力繼續開炮。不過領隊羅渣士今次帶得16位球員去比賽，當中2名貴價新兵賓迪基、羅拔圖法明奴又冇隨隊出征，「卡士」似乎唔多夠咁喎。

巴洛迪利波連尼冇份踢
至於巴洛迪利、波連尼直情被紅軍掟埋一二邊，據英國《衞報》透露，佢哋最近甚至唔可以同一隊操練，仲齊齊落選呢2場比賽嘅大軍名單，怕且佢哋都就快同球迷講拜拜。加上列基林拔盛傳轉戰西布朗，換言之紅軍今仗齋靠丹尼艾格斯同奧歷治攻堅，睇番佢哋喺亞洲之行各自得1球士哥咁大把，證明佢哋仲未融入到球隊，火力都係不宜高估為妙。

另邊廂赫爾辛基雖然名氣欠奉，但由於芬超踢咗過半季賽事，講狀態赫軍點都比紅軍優勝，呢次對住仲未打起100%戰鬥力嘅利物浦唔係冇得踢囉。而且赫爾辛基身為芬蘭班霸，陣中又擁有唔少芬蘭國腳，今晚喺班鄉親父老面前點都唔想輸鑊金，一人走多一步，隨時搞到紅軍冇啖好食呀！