德超盃開戰!
德國超級盃今晚開戰，德盃盟主禾夫斯堡會喺主場硬撼德甲冠軍拜仁慕尼黑。「狼堡」今夏留住鎮隊之寶奇雲迪布尼，加埋新兵麥斯古斯加盟，令隊波嘅戰鬥力比上季更勝一籌，對住人腳唔齊兼舟車勞頓嘅「病仁」，梗係趁你病攞你命啦，禾夫斯堡受讓半一，梗係捧1.82倍下盤啦！（FOX Sports now670台周日凌晨2:30直播）

出爐德國足球先生奇雲迪布尼，係上季歐洲球壇助攻王，唔少豪門到依家都仲打緊佢主意，不過「狼堡」講明唔等錢使，賽前仲表明唔會用佢去交換馬里奧葛斯，向「狼粉」同迪布尼大派定心丸。除咗呢位比利時超級中場，禾夫斯堡並成功挽留瑞士左閘列卡度洛迪古斯，配合德國國腳舒賀爾尼同生力軍麥斯古斯，新季德甲，「狼堡」絕對有力成為爭標嘅一路奇兵。

杜斯古斯達禾傷愈候命
雖然話「狼堡」喺對賽往績上輸多贏少，但上季歇完冬之後就試過喺德甲以4:1大勝拜仁，終止後者嘅跨季21場不敗紀錄，證明佢哋有力同拜仁鍊過，即使賽前有消息話奇雲迪布尼有背傷在身未必踢足，但「兵不厭詐」呢家嘢大家都知，而且荷蘭射手巴斯杜斯同巴西中場路爾斯古斯達禾都傷愈，有望先任後備隨時搏殺，今晚德超盃，正正係攞頭威良機。

拜仁去完中國攰到爆
對面嘅拜仁今夏換血，智利球星維達爾、巴西翼鋒杜格拉斯哥斯達相繼加盟，只可惜佢哋放走咗舒韋恩史迪加，維達爾係醒，不過係咪即刻可以融入陣中、取代「小豬」個位先？再講，呢支德甲班霸傷兵情況極為嚴重，翼鋒列貝利、中場查維馬天尼斯、中堅丹迪同畢斯杜巴都仲養緊傷，早前肌肉受傷缺席中國行嘅「小飛俠」洛賓，都未必趕得切復出，維達爾來投後亦只係操咗一課，點搞呀！

仲有呀，拜仁官網話由於中國天氣炎熱同時差問題，搞到班戰將返德國後攰到爆，況且「病仁」近兩屆德超盃都輸晒，仲讓「狼堡」半一，冇嘢呀？