兩支「神奇球隊」威爾斯、冰島喺今夏歐國盃演出令人眼前一亮，今屆世盃歐洲區外圍賽再接再厲，力爭殺入決賽周！兩軍今晚分途出戰，挑戰同屬自己尅星嘅小組內榜首勁敵，要再創傳奇延續勵志故事難度甚高，睇吓佢哋演出可唔可以繼續帶畀大家驚喜！

世盃外圍賽D組，威爾斯主場迎戰塞爾維亞，威爾斯現時落後「一哥」塞爾維亞2分，換言之今仗只要贏波，就有機會升上榜首，對爭小組首名直接出線，非常重要。威爾斯「黃金中場」加里夫巴利、艾朗藍斯、祖阿倫率領下，勢必強攻對手。塞爾維亞有多位英超兵助陣，絕不示弱，捧中位數2.5球入球大。

（有線64及203台周日凌晨3時45分直播）

塞軍往績贏晒有力搏槌
威爾斯可以歷史性首次晉身歐國盃決賽周，兼打入4強，加里夫巴利居功至偉，呢位皇馬翼鋒今季仍然保持勇態，唔止西甲有5球進帳，今屆世盃外圍賽3戰亦已轟入3球。只要有加里夫巴利助陣，威爾斯入波機會就大增。除咗加里夫巴利之外，唔好忘記仲有兩位英超猛將艾朗藍斯同祖阿倫，特別係祖阿倫今季由利物浦轉投史篤城後，獲得重生，已取得4個聯賽入球，成為陣中首席射手，呢位「威爾斯派路」能傳擅射，令對手防不勝防。加上今屆歐國盃突然冒起嘅前鋒笠臣簡奴，隨時又會帶來驚喜。

至於塞爾維亞人腳亦不俗，擁有車路士孖寶尼曼查馬迪、伊雲洛域，曼城翼衞高拉洛夫、修咸頓中場杜辛泰迪治，佢哋對英國環境好熟悉。同埋塞爾維亞一向剋住威爾斯，雙方近4次交手，塞爾維亞全勝，共攻入12球，唔好睇小佢哋今仗贏波機會。兩軍好大可能搏槌，最好都係揀入球大。