政治對決搬到球場
今晚世界盃外圍賽歐洲區F組爆發「大不列顛內戰」，英格蘭主場硬撼蘇格蘭！兩地雖同屬一國家，但政治取向卻南轅北轍，近年鬥爭更加白熱化，蘇格蘭曾經發動獨立公投，並反對英國脫歐，擺明同英格蘭人主導嘅中央政府打對台，令社會陷入撕裂狀態。政治對決延續至球場，今仗已非3分之爭咁簡易，更關乎民族尊嚴，雙方肯定搏老命駁火，首選中位數2.5球入球大。

（有線61及201台周六凌晨3時45分直播）

英格蘭仲未聘請到新領隊，繼續由U21主帥修夫基暫時領軍，但陣中一班英超豪門球員始終有質素，加上夾慣夾熟，落到場識自動波配合，領隊問題並非今場勝負關鍵因素，反而政治先至係核心。英格蘭無論政治及足球，都係英倫三島「大哥」，遇上「細佬」蘇格蘭連番衝擊，當然唔衰得，否則威嚴將蕩然無存。

哈利仔朗尼合作剃「蘇」
事實上足球方面，英格蘭一向食住蘇格蘭，雙方近6次交手，英軍贏咗5次，而且英格蘭近年大賽外圍賽皆能保持勁旅本色，尤其係主場出擊，連世盃外及歐國外，英軍近10次於自己地頭出戰嘅外圍賽錄得全勝之餘，全部都贏2球或以上，今場勢必主攻，力爭再剃「蘇」。英軍今次大軍名單精銳盡出，熱刺射手哈利卡尼傷愈，上仗英超復出即入波。雖然朗尼今季表現備受批評，但其實不時有佳作，上仗英超貢獻2次助攻，幫曼聯贏波，狀態唔錯，英軍入波機會高。

蘇格蘭博贏為國民爭口氣
另一邊廂，蘇格蘭今次3場外圍賽1勝1和1負，落後榜首英格蘭3分，換言之今場只要贏波，就可以追到同死敵同分，目標非常鮮明。最重要係如果可以擊敗英格蘭，就能夠為一直處於政治及足球劣勢嘅蘇格蘭人出一口氣，意義已超出體育層面，一定當生死戰咁踢。蘇格蘭有唔少國腳喺英超搵食，包括侯城翼鋒辛迪加斯、西布朗中場費查等人，熟悉英格蘭踢法，相信兩隊可以迅速入局搏槌，有利製造大比數賽果。