今晚英超獨腳戲有下游「雙史之戰」，由史篤城主場迎戰「天鵝」史雲斯。史篤城擺脫季初嘅低迷，聯賽2連勝重回正軌，同主帥曉士還原基本步，先做好防守大有關係，今仗係史雲斯第200場英超賽事，但作客環境唔敢冒進，兩軍大施「守」術下，今仗唔慌多波入，揀中位數2.5球嘅細盤最划算。

（Now 621及Le SportsHK應用程式周二凌晨4時直播）

史篤城在主帥曉士帶領下，一改前任佩尼斯嘅高Q大棍悶波，近年不斷注入「技術流」打法，好睇咗兼穩守中游位置。不過曉士想更進一步，季初改踢433陣式，反而令攻守失衡，頭7仗聯賽只錄得3和4負未贏過。好彩曉士都唔係咁固執，近期用番4231陣式，立即令防線穩陣番好多，近2仗聯賽贏晒兼保持清白之身，全部總入球均少於3球，證明防守有所改善。

「天鵝」200場都唔敢搏
至於季初猶如不設防嘅史雲斯，自怒炒古度連搵咗新帥巴特利接手後，表現逐漸有起色，呢位美國籍領隊首度領軍僅敗阿仙奴2比3，上仗作客則同屈福特互交白卷，睇得出佢非常注重防守，由於「天鵝」聯賽只入8球，就算今仗係佢哋第200場英超賽事，但都係要穩陣行先，希望搶得1分得1分，預計好大機會悶戰一場，捧入球細最好路。