阿仙奴「冠軍」入定貨

新一季英超下周開鑼，英超「冠軍」亦已開售。撇除現已降落英冠嘅布力般流浪，歷屆英超冠軍不離曼聯、曼城、阿仙奴和車路士四大勁旅，所以揀「冠軍」唔使刻意求冷，集中研究強隊已足夠。阿仙奴自從引入奧斯爾、阿歷斯山齊士等球星後攻力已有保證，今季仲有施治把守最後一關，絕對有力一搔12年之癢，如果嚟緊周日擊敗車路士捧走社區盾，冠軍賠率肯定升溫，現有5.25倍建議可提早入貨。

阿仙奴最近一次贏得英超冠軍係03至04球季，當年佢哋保持全季38場聯賽不敗，至今依然未有球隊可達相同成就。雲格早年喺球員買賣上一向「量入而出」，甚少花高價買人，但隨着近年球會財政有改善，雲格開始大破慳囊，奧斯爾、阿歷斯山齊士、韋碧克等前線好手先後來投，更令球隊攻擊力明顯「升呢」，除咗連奪兩屆英足總打破錦標荒，上季亦打破多年來嘅「四哥」魔咒取得一席季軍。

施治補上「最後拼圖」
但想贏冠軍淨識入波係唔夠，今季佢哋由倫敦死敵車路士羅致捷克門神施治，目的就係要加強防線穩定性。曾經四奪英超冠軍、三度榮獲英超金手套獎嘅施治把關技術無庸置疑，佢嘅加盟可以講係填補咗球隊多年來最弱一環，有傳媒形容佢係阿仙奴攞冠軍嘅「最後一塊拼圖」，足證對佢嘅期望。

阿仙奴上周連挫里昂、禾夫斯堡贏得酋長盃演出獲好評，但嚟緊周日晚對車路士嘅社區盾先係真正考驗，如果能夠擊敗上屆冠軍先拔頭籌，相信阿仙奴嘅奪標賠率會進一步升溫，所以大家不妨趁目前仍有5.25倍率先入貨，順便考吓自己嘅眼光。