車路士上季重奪英超冠軍，其他英超球會對住佢哋，肯定會踢得更加搏命，假如車仔要衞冕成功，就要睇新加盟嘅法卡奧，去到史丹福橋球場到底會變「老虎」定「病貓」，事關迪亞高哥斯達不時受傷，雷米又未夠級數，好需要法卡奧翻生去爭標。

其實車仔放走嘅杜奧巴、菲臘路爾斯同施治，都唔係隊中主力，所以領隊莫連奴並冇要求老細阿布開大水喉買人，保持原有班底已經有信心拎冠軍，特別係車仔上季喺聯賽對爭標對手曼城、阿仙奴同曼聯未輸過，只要法卡奧復活，車仔就好大機會冧莊。