欢迎来到足球图库!
当前位置:主页 > 香港商报 >
蘇斯黑柴:利洛組合愈踢愈神 不敗大戰拜仁搶芬
时间:2016-11-09 01:46   来源:足球图库

 
相信大家都記得,拜仁昔日喺軒歷基斯帶領嘅五冠王強勢年代,前線洛賓同列貝利一雙魔翼縱橫天下,將敵衞玩弄於股掌之中,德國傳媒為之驚嘆,將佢哋名字加埋拼成Robbery稱號,近期洛賓喺教練安察洛堤畀番佢更多自由下重生,配合勇達巔峰嘅射手羅拔利雲度夫斯基,喺上輪作客奧格斯堡嘅聯賽,兩人包辦晒3個入球同3個助攻,德媒再之畀佢哋一個新合併稱號:Robbandowski!黑柴簡單叫佢哋做「利洛組合」,因為佢哋每次組織都清脆利落,輕易撕破對方防線,洛賓話佢同利雲本身踢法各有優劣,但經過夾慣夾熟後,依家互補不足,發揮出嚟嘅威力已經唔係1+1=2咁簡單。

事實上,羅拔利雲度夫斯基今季持續勇態有餘,喺3線作戰14場賽事交出14個入球同4次助攻,極為恐怖,而佢喺周中歐聯作客燕豪芬之役,全場個人共取得8次射門,當中兩個入球之餘仲有3次中柱,實在火熱得交關,而計到呢一刻,佢喺歐聯為拜仁上陣56場入咗36球,亦追平咗巴塞球王美斯當年同期成績添!今晚主場遇上今季神奇球隊賀芬咸,拜仁當然唔會輕敵,預期呢對「利洛組合」會繼續強勢交功課。

賀芬咸「從未有過嘅自信」
不過,賀芬咸喺29歲少帥拿高斯文帶領下亦來勢洶洶,聯賽9戰不敗兼近5仗全勝,排第3位只落後拜仁4分,隊長施巴斯坦魯迪話,少帥嘅新「352」陣式非常奏效,現時每個球員都比上季強,而且自信未到止境,仲可以有更大進步,今晚會以「從未有過嘅自信」挑戰班霸,而且佢哋唔會放過任何進攻機會,要帶畀球迷一場難忘比賽,你話今仗入波又點會少呢?
 

上一篇:Yennie:爭入三甲全力搏拳 車仔拖肥射手大鬥法     下一篇:工廠仔:近9次交手未輸過 墨爾本勝利財悉兼收