贏波即入季後賽決賽
日職次階段煞科戰今日上演，「一哥」浦和紅鑽會喺主場硬撼橫濱水手，紅鑽雖已拎到次階段冠軍同季後賽入場券，但今仗只要贏波就直入季後賽決賽，必定一鼓作氣，挾住聯賽6連勝氣勢，紅鑽有力擊敗踢「風流波」嘅水手，讓球主勝不容錯過。

（有線61及201台周四中午12時30分直播）

日職上季恢復分首、次階段角逐，除兩階段冠軍球隊可殺入季後賽，全年總積分榜頭3位亦可獲季後賽入場券，當中最高分一隊更可直入季後賽決賽。紅鑽目前喺總積分榜僅領先次席嘅川崎前鋒1分，只要今仗擊敗水手，就毋須理會同時舉行嘅前鋒對大阪飛腳賽果，直接進身決賽，到時養精蓄銳，對爭總冠軍好有幫助。

紅鑽早前互射12碼勇挫飛腳贏日聯盃冠軍，近6仗聯賽更獲得全勝、轟入15球嘅佳績，主力射手興梠慎三同武藤雄樹更包辦當中7球，為求率先進身決賽以逸待勞，今仗必定搏到盡。相反，水手依家喺聯賽無欲無求，近3仗聯賽只獲1勝1和1負，明顯已將注意力放晒喺日皇盃，唔想喺無關痛癢嘅聯賽導致傷兵情況加劇，今仗隨時避重就輕，難擋如狼似虎嘅紅鑽來襲。

前鋒戰意贏晒飛腳
至於排總積分榜次席嘅川崎前鋒，將會主場迎戰大阪飛腳，對於前鋒嚟講今仗目標鮮明，就係贏波全取3分，可唔可以爬紅鑽頭就聽天由命喇，對手飛腳近7仗比賽只贏過1仗，肯定入唔到季後賽，今場戰意完全輸蝕，射手安達臣柏德列仲返咗巴西醫腳，川崎前鋒有望開主W。

（有線64及203台周四中午12時30分直播）