歐聯E組形勢非常緊湊，踢咗3輪後4支球隊都有機會出線，目前排次席嘅熱刺今晚主場迎戰排第3嘅利華古遜。熱刺防線演出穩定，不過缺少哈利卡尼下前線啞火，搞到變「和波專家」，利華古遜近況麻麻，同樣不求有功、但求無過，今屆歐聯3戰皆和，今仗3.4倍和局好路。

（有線61及201台周四凌晨3時45分直播）

熱刺踢開超體力化足球，經常波到人到，想突破佢哋防線唔易，佢哋目前係英超失球最少球隊，洛里斯把關嘅大門絕唔容易被攻陷。不過自從哈利卡尼養傷後，熱刺一直冇個可靠前鋒，南韓箭頭孫興民並非多產射手，今仗倒戈利華古遜更易畀對手摸通條路，難有作為；另一前鋒雲遜贊臣就勁有「水貨」Feel，熱刺近5仗和足4場，而且佢哋借溫布萊做主場，連「主場之利」都講唔上，想贏波難度又增加。

利華古遜分組賽全和
利華古遜今季表現低迷，雖然整體實力仍然強勁，但球員信心不足，近5仗比賽先至贏得1場，球員陣上表現患得患失，尤其出戰歐聯往往怕輸而唔敢去盡，今屆3仗分組賽全部都係和波收場。利華古遜今仗作客將以1分為目標，面對主隊呢隻「冇牙老虎」，有望頂住各執1分。