祖記大炒有信森
今晚意甲開快車，祖雲達斯主場迎戰森多利亞，祖雲達斯上仗作客不敵AC米蘭，已被羅馬同AC米蘭追到氣咳，今晚返回主場迎戰「客場蟲」森多利亞，誓要大勝一仗打場爭氣波，1.52倍讓球主勝捧得過。

（TVB 303周四凌晨2時45分直播）

祖雲達斯上仗聯賽作客0比1輸畀AC米蘭，未計周三凌晨賽事，只比羅馬及AC米蘭多2分，基本上已冇優勢可言。祖記上仗對AC表現其實唔算太曳，如果唔係球證上半場「彈弓旗」判比真歷嘅罰球唔入，戰果隨時改寫。祖記今季聯賽4次喺主場出擊全部贏晒，就算有阿根廷前鋒保羅戴巴拿養傷亦冇有怕。

森多利亞上仗聯賽雖然喺打吡戰主場2比1擊敗熱拿亞，不過佢哋近4仗作客聯賽只得1和3負，只能喺升班球隊佩斯卡拉身上搶到1分，作客強隊冇運行，而且森多利亞上季作客祖雲達斯曾經淨吞5蛋，今仗再被大炒唔出奇。

拿玻里捱殘吼細盤
另1場直播賽事，拿玻里主場鬥安玻里， 拿玻里上仗有超過半場時間10人應戰，最終雖然以2比1擊敗克羅托內，但所花氣力甚大。拿玻里已經有米利克因傷長抖，依家仲冇埋上場被趕出場、今仗要坐波監嘅加比亞甸尼，面對近6仗聯賽有5次總入球唔超過2球嘅安玻里，入球細係投注首選。

（TVB 302周四凌晨2時45分直播）