要返祖家幫經理人做伴郎
國際冠軍盃中國站今晚繼續有好戲上演，皇馬會喺上海大戰AC米蘭，其中「銀河艦隊」嘅「同花順」已經重新集合，而且據講C朗踢埋呢場波，就會返葡萄牙幫金牌經理人佐治文迪斯做伴郎，C朗梗係希望入波砌低AC，作為老友嘅結婚禮物，咁有鬥志梗係捧皇馬主W啦！（有線61、64、201、203及廣東體育周四晚8:00直播）

皇馬早前以3:0打沉國際米蘭，延遲歸隊嘅占士洛迪古斯後備復出射入世界級罰球，就算賓施馬休息1場後，相信都會打番正選，配合埋孭飛球星C朗，「銀河艦隊」嘅火力根本冇乜邊隊頂得住。單睇皇馬喺國冠盃對住踢法比較保守嘅曼城同國米，兩場波夾埋已經喪入7球，就知佢哋班波已經提早撻着晒，有條件繼續帶挈支持者收錢。

皇馬近兩場喪入7球
有消息話C朗踢埋呢場波，就會返葡萄牙出席金牌經理人佐治文迪斯嘅婚禮，而且仲會做埋伴郎添！眾所周知當年C朗離開曼聯去皇馬，佐治文迪斯出咗唔少力，既然呢位「萬人迷」連皇馬職員都送iPhone做開咧禮物，老友補辦婚禮又點會只拎梳蕉？梗係要踩油入波，醒醒神神返祖家見人啦！

AC新帥認未夠班
至於皇馬今戰對手AC米蘭，雖然都簽咗雷斯阿祖安奴同卡路士巴卡增強前線火力，不過佢哋個新帥米赫洛域最近亦認低威，話「紅黑兵團」未夠實力爭意甲冠軍，叫Fans唔好咁大期望住，仲要連隊長蒙杜利禾都和應埋一份，由此可見班「紅黑兵」都知未夠「哥利」同皇馬過唔去，新兵未夾熟兼且防線又唔掂，撞正皇馬「同花順」一出，AC邊有得打吖！