美職季後賽淘汰圈聽朝揭開戰幔，當中西岸勁旅洛杉磯銀河主場硬撼皇家鹽湖城。西岸「3哥」銀河雖有中場謝拉特及隊長羅比堅尼未必出得，但今季「忽然復出」嘅當路雲仲好Sharp醒，加上近4次聯賽主場對鹽湖城大獲全勝，今仗有力贏波入4強，1.62倍主勝有計。
（周四早上10時30分開賽）
銀河嚟到季尾傷兵成籮，星級中場謝拉特及羅比堅尼受傷患困擾，今仗未必能趕及復出。好彩2014幫球隊攞到總冠軍後掛靴嘅前鋒當路雲，突然喺9月宣布復出，呢位前美國國腳經驗豐富，經常墮後一格為阿倫哥頓及杜斯山度士鋪橋搭路，對前線人腳不整嘅銀河嚟講，可謂及時雨。由於銀河在前仗已鎖定第3名，上仗對FC達拉斯正選立即收起阿倫哥頓及杜斯山度士等主力，擺明畀佢哋抖足迎接季後賽。
鹽湖城傷兵多近況走樣
另邊廂，皇家鹽湖城同樣勁多傷兵，摩域斯恩、艾朗馬恩特及文迪尼拿已缺陣多場，導致聯賽於季尾表現大走樣，近5仗僅得1勝4負，最終只排西岸第6，表現差強人意。翻查紀錄，原來銀河近4次於自己地頭出戰皇家鹽湖城，竟然全部贏晒，鹽湖城未踢已經腳仔軟，造訪養精蓄銳嘅銀河冇運行，1.62倍主勝咪錯過。
